Baionatik Parisera 1035 kilometro eginen dituzte bizikletaz. Elbarritasun psikiko edo mentala duten 10 pertsonek markatu dute desafioa, agorrilaren 15etik 30era, olinpiar jokoak eta ondotik paralinpikoak izanen direla baliatuz. Osasun mental eta psikikoan arazoak dituzten pertsonei kirola eta aisialdia eskaintzen dien Olagarroa elkarteak bultzatzen du egitasmoa. Orain, behar diren bizikleta egokituak erosteko dirua behar dute eta horretarako diru bilketa kanpaina abiatu dute.
Ezpeletako biperrak interesa piztu du Afrikan. Baina ez salerosketa aldetik, sor-markaren garapenarengatik baizik. Hainbat ekoizlek egin dute bidaia Lapurdiko herriraino Benin, Senegal, Boli Kosta, Kamerun eta Gineatik. OAPI jabetza intelektualaren Afrikako erakundearen laguntzaz egin dute bidaia, Ezpeletako biperra nola egituratua den, laborariak nola antolatuak diren eta sor-marka nola aitzina eramaten duten ezagutzera. Aste osoa pasako dute Ipar Euskal Herrian, hainbat tailer eta bisita burutuz.
Aldi baterako bizitegi turistikoen kopurua apaltzeko xedearekin, duela bi urte Euskal Hirigune Elkargoko hautetsiek, gehiengo azkarrarekin, konpentsazio arautegi bat onartu zuten, urte osoko alokairuen emendatzea bultzatzeko. Iaz jarri zen abian araua, eta Alda elkartearen iritziz emaitza onak eman ditu. 2020 eta 2023 artean abantsu 10.000 alokairu turistiko baimendu ziren; aldiz, iazko martxoaren lehenetik soilik laurehun bizitegik jaso dute baimena.
Patrcik Poivre d’Arvor frantses telebista aurkezle ohiaren aferan, bi bortxaketa eta eraso sexual bati buruzko inkestak segitzea galdegin du Nanterreko auzitegiak. Bigarren salaketa fase horretan 22 emaztek eman dute lekukotasuna, eta horietatik hemeretzi salaketa eta seinalamendu prozesutik at gelditu dira. Une honetan, 45 lekukotasunetik, bakarrik, PPDAk egindako hiru bortxaketa eta eraso sexual bati buruzko instrukzioak dira bidean. Nora Arbelbide Berriako kazetari ohiak ere jasan zuen PPDAren jazarpena 2003an. Bere kasua segidarik gabe sailkatu bada ere hurbiletik segitzen du afera.
«Etxe bakoitzean uztartzen dira euskal eta gaskoi kultura; ez da mugarik» halaxe mintzo da Inesa de Gaxenen pertsonaia, Pantxika Urruti errejentak antzezturik. Bi astero Bastidan edo Bardozen elkartzen dira, pastoraleko 105 arizaleak. Euskaraz eta gaskoiez aurkeztuko dute Xarnegu eskualdeko pastorala. Itxaro Bordak euskarazko partea idatzi du, eta Ivan Bareyrek gaskoirerazkoa. De Lancreren garaian, etengabe akusatua baina beti ukatu zuen sorgina izaitea Inesa Gaxenek. Gogorki zigortu zuten, Hondarribitik bidali zuten ontzi batean eta desagertu zen. Ekainaren 15 eta 16an estreinatuko dute Xarneguko pastorala.
Zirtzil eta dantzariek hartu dute Baigorri igande honetan. Aroa lagun izan gabe ere, jendetza hurbildu da Baigorriko gazteek prestatua zuten emanaldia ikusteko. Beste herri batzuetan ez bezala, dantzariek genero gabeko jantzi bereziak sortu dituzte, eta ber logika barneratu dute haien koreografietan. Euskal dantzek aitzina egin dezaten «tradizioa atxiki, baina geroari buruz begiak irekita» izatea baitezpadakotzat jotzen du Oier Araolaza euskak dantzetan adituak. Desmartxa interesgarria iruditu zaio Baigorriko dantzariek landu dutena.
Garaziko euskarara aztergai hartu du Alex Artzelus euskal filologoak. Doktorego tesia eskaini dio baxe nafarreraren barne aldaera horri, eta hura baliatzeko metodo bat lantzea du xede. Artzelus bergararra da sortzez, Azpeitian hazi da eta Gasteizen ikasi zuen euskal filologia. Orain, zortziehun orriko tesia gotorra, metodo bilakatzeko xedea du. Horretarako Aitor Arana euskalari nafarrak Zaraitzuko edota hego goi-nafarrera irakasteko egin dituen metodoak hartu ditu eredu. Garaziko mediatekan bere lanaren aurkezpena eginen du martxoaren lehenean, arratsaldeko 18:30etan.
Lantegi berria estreinatuko du Alki kooperatibak agorrilean Larresoron. Gune berriak 10.000 metro karratu ukanen ditu, eta langile taldea bikoiztea ahalbidetuko die. Egun, berrogei langile dira eta 80 enplegatu nahi lituzkete. Horrela, ekoizpenaren heina ere biderkatu nahi lukete, frantses merkatutik nazioarteko jauzi egiteko. Akitania Berriko eskualdeak 500.000 eurorekin lagundu du kooperatibaren hazkunde xedea. Sos zama horrek Larresoroko lantegi berriaren tresneria finantzatzeko baliatuko du kooperatibak.
