Sorkuntza euskaraz bultzatzeko idazketa lehiaketak loratzen ari dira. Sormena, hizkuntza edo narrazioa lantzeko ariketa bikaina gazteentzat eta bizipenak kontatzeko aukera helduentzat. Hiru lehiaketa bidean dira momentuan. Batetik Le Basque et la Plume, literatura lehiaketaren bigarren edizioa, aurten ere Baionako besten inguruan. Bigarrenik, Korrikaren kari AEKk antolatu duen Paperezko bizitzak ipuin-lehiaketa. Euskara urririk ikasteko eskubidearen gaia jorratu beharko dute idazleek lehiaketa horretan. Eta hirugarrenik, Kanboko mediatekak kirolak eta jokoak gai harturik eleberri labur bat idaztea proposatzen die hamabi eta hamalau urte arteko gazteei.

Asteburu honetan, bi hitzaldi antolatuak dira Europako migrazio politikaren gaia ardatz dutenak. Etorkin kopuruaren igotzearen aitzinean Europaren posizionamendua eta erabakiak aipatuko dira, asilo galdearen kudeaketa eta kopuruaren emendatzea eta beste hainbat puntu aipatuko dira. Hitzaldi horretan, Tania Racho Europako zuzenbidean doktoretza eta Desinfox-Migrations sareko kidea izanen da, Pernando Barrena EH Bilduko Eurodiputatu ohia eta Damien Careme eurodiputatua izanen dira gomitak. Hitzordua, ostiralean Donapaleuko gela berdean arratseko 20:30etan eta larunbatean, Baionako Zizpa Gaztetxean 9:30etan.

Baigura inguruko laborarien lan zama apaltzeko, langile partekatuak. Azken asteetan Gure Gain elkarteak inkesta bat gauzatu du Baigurako zortzi herrietako 340 etxaldeen beharrak identifikatzeko. Lan zama handiegia nabarmendu dute laborariek, baita langile gehigarriak hartzeko ezintasuna ere. Hori dela, bospasei etxaldek langile partekatu bat hartzeko aukera aztertzen ari dira Gure Gain elkarteak. Otsail hastapenean abiatu dute lanketa gai zehatz horren inguruan, eta lan bilkurak abiatuko dituzte aurki. Gure Gain elkartea duela hamar hilabete aurkeztu zuten Bidarrain, Baigura inguruko zortzi herrietako mendiko lurrak kudeatu eta laborantza jarduera laguntzeko.

Mugaz gaindiko herritarren diagnostikoa egin nahi du Ipar Euskal Herriko Garapen Kontseiluak eta Nafarroako CEDERNA-GARALUR erakundeak. Bederatzi tailer antolatu dituzte lekuko erronkak atzeman eta geroari buruzko hausnarketa eraikitzaile bat plantan emateko. Urepelen, Orbaitzetan eta Izaban egin dituzte lehen tailerrak azaroan, eta heldu diren asteetan, Baztan-Baigorri-Bidarrai-Itsasu, Xareta-Baztan, Bidasoa-Bortziriak-Azkaine-Urruña-Biriatu eskualdeetan ezarriko dute begirada. Hitzordu bakoitzean, artista bat ere gonbidatuko dute, parte hartzaileen gogoetak sorkuntza baten bidez irudikatzeko. Horrez gain, ikus-entzunezkoa ere baliatuko da, Kanalduderekin eta Euskal irratiekin eraman partaidetza baten bidez.

Lantegi berriak sortzeko lur eskasiari buru egin nahi dio Euskal Hirigune Elkargoak. Horretarako dispositibo berri baten esperimentazioa gauzatzen ari da. 'Eraikuntzarako alokairua' deitu diote, eta haren bidez, agro-elikadurako Bihur enpresari 50 urteko alokairu kontratua proposatu diote Aiherrako aktibitate eremuan. Hondarkin organikoak berreabiltzen dituen enpresa horrek bertan eraikiko du bere eraikina, eta lurra alokairuan izanik ere, egoitzaren jabetza beretzat atxikiko du.

Usain eta kolore gabeko gas erradioaktiboa da radona. Jatorri naturalekoa da, eta oro har, ez du lanjer handirik eragiten. Haatik, batzuetan etxeetan metatu daiteke eta orduan, barneetako aire-kalitatea kutsatu dezake, eta kasu ematen ez bada, birikako minbiziak sorrarazi ditzake. Ipar Euskal Herrian, hamabi herrietan agertzen da gas erradioaktibo hau manera aski azkarrean: Baxe Nafarroan Lasan, Uharte Garazin, Arnegin, Hoztan, Donaixtin, Arrosan eta Ortzaizen; Lapurdin Urruñan, Biriatun, Saran eta Ezpeletan; eta Xiberoan, Santa Grazin. Hori dela eta, CPIE ingurumen zentroak radona neurtzeko dosimetro eta neurgailuak proposatuko dizkie herri horietako biztanleei. Ingurumen zentroaren egoitzetan eskuratu daitezke baliabide horiek.

Duela 40 urte hil zuen frantses poliziak Didier Lafitte Baionan. Donibane Lohizuneko arrantzalea tiroz hil zuten, Iparretarrak taldeko Gabi Mouesca autoz hitzordu batera eramaten zuela. Gertakari horren ondoren, Mouesca hamar urteko presondegi zigorrera kondenatua izan zen, eta tiroa egin zuen polizia errugabetua. Lau hamarkada iraganik, Didier Lafitten memoria berreskuratuko dute haren lagunek. Otsailaren 26tik martxoaren 3ra aste beteko omenaldia antolatu dute zine-eztabaida eta mahai-inguruekin. Martxoaren hiruan, aldiz, Arrantzale Maitagarri eguna antolatu dute Donibane Lohizunen.

Etorkinen kopurua anitz emendatu da Irun eta Hendaia arteko pasabidean. Irungo Harrera Sareak ohartarazi duenez, otsailean bakarrik 600 pertsona lagundu dituzte, iaz, urte osoan 2.700 izan zirelarik. Iragan urtarrilean, 2.700 etorkin heldu dira Kanariar Uharteetara, egunero 80 pertsona, hain zuzen. Horietatik anitz Irunera arribatuko dira Irunera, Europa iparraldera beren bidaia segitzeko. Haatik, espainiar eta frantses polizien mehatxu azkarra jan beharko dute mugan.

Urruñako Tokiko Elikadura Osasuntsuaren asteak bigarren edizioa ukanen du. Elikagaiek «hazitik, sukaldera» egiten duten bidea ikustarazi nahi du ekimen horrekin Urruñako herriko etxeak. Martxoaren 11etik 16rako astean eskolek ezagutza eta sentsibilizazio tailerretan parte hartuko dute, eta GEUZ egiturako kideek tokiko eta sasoiko menu bat prestatuko dute. Horrez gain, hainbat mahai inguru izanen dira eta bi dokumental proiektatuko dituzte besteak beste. 2025erako sukalde zentralizatu bat sortzeko proiektua du Urruñako herriko etxeak, eskoletako jantegietan tokiko ekoizpenak baliatzeko, baita adineko herritarrei etxez etxeko apairu banaketa proposatzeko ere.